Aller aux commentaires
Complainte sur la mort d'Henri III 1589
Pleurez, Pleurez, fidelles royalistees
Et vous aussi que l'on dit Politiques
Vous devez bien pleurer a ceste fois
D'avoir perdu noble, Henri de Valois.
Ce noble roy de France et de Pologne
Qui vous aymoit autant que sa personne
Il fut tué par un meschant mutin
Jacques Clément qui estoit Jacopin.
Jacques Clément si tu estois à naistre
Las ! nous aurions nostre roy, nostre maistre
Tu l'as occis avecques un couteau
Tu as faict pis que fit oncques bourreau.
Incontinent que tu reçus baptême
Te fust venu quelque mort bien extresme
L'on te tiendrait au rang des innocents
Là où tu es le meschant des meschants.
Ce fut en Aoust, en sortant de l'église
Estant remply de toutes meschantises
Comme celui qui n'a ne foy ne loy
Tu t'en allas pour massacrer le roy.
Quand de Sainct Pierre aux liens on faict feste
Droict au faux bourg ce traistre se transfère
Devant le roy se mettant a genoux
Avant toujours son malheureux courroux.
En lui disant : Bonjour mon roy et maistre
Je suis icy vous portant une lettre
Que vous transmet de Brienne le seigneur
Qui prisonnier a besoin de faveur.
Ils ont cogneu la faulte qu'ils ont faicte
D'avoir voulu eslire un autre maistre,
Et ce voudroient bien tous estre endormis
Alors que vous sortistes de Paris.
Le noble roy voulant lire la lettre
Ne se doubtant pas de ce malheureux traistre
De sa gran'manche en sortit un cousteau
Qui lui perça le ventre et le boyau.
Incontinent les archers de la garde
Subitement à grands coups d'hallebarde
Se sont jetés dessus le Jacopin
Jusques à tant qu'ils en ont veu la fin
Après cela que tous ces Seigneurs virent
Que pensez vous les regrets qu'ils en firent ?
Chacun croit que pour ce grand pesché
Cet assasin en avoit bon marché.
Quand le roy vit que la mort falloit prendre
A Jésus Christ son âme il recommande
En lui disant : Ayez de moy mercy
Car je suis mort sans l'avoir déservi.
Et vous aussi, noble roy de Navarre
Soyez toujours suivi de bonne garde
Ne vous fiez en ces traistres ligueux
Car vous voyez le malheur qui vient d'eux.
Si l'on a veu un grand malheur en France
C’est aujourd'hui, hélas ! car il avance
Le cours de vie du noble roy Henry
Je prie Dieu qu'il lui doint Paradis.
Mais, ce grand roy de Navarre et de France
Nous ostera trestous hors de souffrance ;
Ainsi il est à toutes vertus né
Et pour nostre heur du haut ciel destiné.
Retourner en haut de page
Pas de commentaires
|
||||||||
