Aller aux commentaires
Chanson de croisade1244. Tous li mons
I
Tous li mons doit mener joie
Et estre bien envoisiés ;
Li rois de France est croisiés
Pour aler en chele voie
La ou chil pas ne s'emploie
Cui tient detriés ses peschiés.
Sans est qui en la mer noie.
Trop m'est tart que je n'i soie ;
La Diex fut crucefiiés :
N'a nul qui aler n'i dois.
II
Ne savés pas l'aventure
Pour quoi li rois est croisiés ?
Et est leaus et entier
Il n'est preudoms a droiture
Tant com ses roiames dure
Est il amés et proisiés :
Sainte vie, nete et pure
Sans pechié et sans ordure
Maine fi rois, ce sachiés
Qu'il n'a de mauvaiseté cure.
III
Il ot un maladie
Qui longuement li dura
Par quel raison se croisa :
Quar bien fu lieue et demie
Qu'en qui doit qu'il fust sans vie :
Aucun dist qu'il trespassa.
Dame Blanche l'eschevie,
Qui est sa mère et s'amie
Mout durement s'escria
"Fis tant dure départie !"
IV
Tuit quidièrent voirement
Que li roi fust trempassés.
Uns dras fu seur li jeté.
Et plouroient durement.
Entra i toute sa gent ;
Onc tiex diex ne fu menés.
Li quens d'Artois voirement
Dist au roi mout doucement
"Beax dous frère a moi parlés.
Se Jésus le vous consent !"
V
Adont li rois soupira;
" E ! beaus frere, dous amis,
Ou'st li vesques de Paris ?
Or tost ! si me croisera,
Quar longuement esté a
Outre mer mes esperis
Et li miens cors i ira,
Se Dieu plaist, e conquerra
La terre seur Sarrasins
Bien ait qui m'i aidera.
VI
Tuit furent joiant et lié
Quant ils oïrent le roi,
Et si se tindrent tuit coi.
Fors sa mère au cors dougié
Doucement l'a embrachié ;
"Beau fils. entendés à moi:
Je vous dourrai de deniers
Chargiés quarante somiers
Bonement le vous otroi
A doner as soudoiers."
VII
Chascuns à cheste nouvele
Doit estre bien esbaudis,
Quar, issi com m'est a vis.
Ele est avenant e bele.
Mout sera en haute sele
Devant Dieu en Paraïs
Qui respandra sa cervele
Ou son sanc ou sa bouele
En la terre ou au païs
Là Dieu nasqui de s'ancele.
Retourner en haut de page
Pas de commentaires
|
||||||||
